Rheoli arian

Mae yna lawer o ffyrdd o reoli eich arian a gwneud arbedion, dyma rai enghreifftiau:

Trwydded deledu

Mae’n bwysig talu eich trwydded deledu gan y gallwch gael dirwy am beidio â chael trwydded. Mae yna lawer o wahanol ffyrdd o dalu, a gallwch dalu’n wythnosol, yn fisol, bob 3 mis, neu’n flynyddol. Am ragor o wybodaeth ewch i wefan trwyddedu teledu neu ffoniwch 0300 555 0286 .

Nwy a thrydan

Mae’n bwysig cyllidebu ar gyfer nwy a thrydan. Dylai eich cyflenwr ddarparu opsiynau talu addas i chi a rhoi’r opsiwn i chi o daliadau misol neu wythnosol.

Os yw eich defnydd o nwy/trydan yn uchel, gallwch gael cyngor gan y Gwasanaeth Cynghori Arbed Ynni .

os oes gennych chi fesurydd rhagdaledig ac rydych chi’n rhoi llawer o arian yn eich mesurydd bob wythnos, gallai hyn fod oherwydd eich bod chi’n talu dyled yn ogystal â thalu am yr hyn rydych chi’n ei ddefnyddio. Gofynnwch i’ch cyflenwr a allwch chi leihau’r swm rydych chi’n ei dalu am y ddyled. Mae gan rai cyflenwyr tanwydd gronfeydd ymddiriedolaeth a all helpu os ydych chi’n cael trafferthion ariannol. Gofynnwch i’ch cyflenwr a oes ganddyn nhw gronfa ymddiriedolaeth neu fel arall gallwch chi lawrlwytho canllaw gan Auriga Services y gallwch chi ei ddefnyddio i ddod o hyd i gronfeydd ymddiriedolaeth i gael help gyda biliau ynni a dŵr. Bydd rhai o’r cronfeydd ymddiriedolaeth hefyd yn helpu gyda grantiau ar gyfer eitemau hanfodol i’r cartref hefyd.

I ddod o hyd i’r fargen orau gallwch wirio Cyngor ar Bopeth neu fel arall ffonio llinell gymorth Cyngor ar Bopeth ar 0345 404 0506.

Gallwch hefyd ddod o hyd i restr o safleoedd cymharu awdurdodedig ar wefan Ofgem .

Dŵr

Os ydych chi’n cael trafferth gyda’ch bil dŵr, darganfyddwch gan eich cyflenwr a ydych chi’n gymwys ar gyfer tariff cymdeithasol a hefyd a oes gan eich cwmni dŵr gronfa ymddiriedolaeth y gallwch wneud cais iddi. Os ydych chi’n gymwys ar gyfer tariff cymdeithasol gallwch chi gael gostyngiad ar eich bil, a gall cronfeydd ymddiriedolaeth helpu os oes gennych chi ddyled dŵr rydych chi’n cael trafferth ei thalu.

Mae llawer o wybodaeth ddefnyddiol ar wefan Cyngor Defnyddwyr Dŵr .

Llinell Dir, Symudol a Band Eang

Os edrychwch ar eich cyllideb efallai y byddwch yn sylwi bod eich costau llinell dir a ffôn symudol yn cynyddu’n fawr y mis, yn enwedig os oes rhai ohonoch yn yr aelwyd gyda ffonau symudol. Efallai y byddwch yn gymwys ar gyfer BT Basic sef pecyn rhentu llinell a galwadau cost isel sydd ar gael i bobl sy’n derbyn rhai budd-daliadau. Gallwch ddysgu mwy ar wefan BT . Fel arall, mae’n werth ffonio’ch cyflenwr i weld a allwch gael pecyn rhatach a gofyn iddynt pa rannau o’ch pecyn sy’n costio fwyaf.

Mae llawer o wybodaeth ddefnyddiol ar wefan y Gwasanaeth Cynghori Ariannol .

Teithio

Os ydych chi’n defnyddio trafnidiaeth gyhoeddus efallai y byddwch chi’n gallu arbed arian drwy brynu tocyn teithio.

Os oes gennych anabledd efallai y byddwch yn gymwys i gael tocyn bws i bobl anabl. Darganfyddwch pwy sy’n rhedeg y cynllun yn eich ardal.

Os ydych chi’n anabl gallwch chi hefyd wneud cais am gerdyn rheilffordd i berson anabl .

Os oes gennych chi gar, peidiwch ag anghofio cynnwys pethau fel eich MOT, yswiriant, petrol a threth ar eich taflen gyllideb. Mae yna lawer o wefannau cymharu y gallwch chi eu defnyddio i geisio dod o hyd i’r fargen orau ar yswiriant car. Efallai y bydd rhai problemau hefyd mewn perthynas ag yswiriant car os oes gennych chi salwch meddwl.

Dewis arall ar gyfer teithio yw beic. Mae’n ffordd iach o deithio o gwmpas ac mae astudiaethau’n dangos y gall bod yn egnïol wella’ch iechyd meddwl. Os ydych chi’n gweithio, gallwch wirio a oes gan eich cyflogwr gynllun Beicio i’r Gwaith.