Sut alla i dalu fy miliau os ydw i yn yr ysbyty?

Gallwch roi’r hawl i rywun arall gael mynediad at yr arian yn eich cyfrif banc neu gymdeithas adeiladu. I wneud hyn, mae angen i chi ofyn i’ch banc neu gymdeithas adeiladu am ‘fandad trydydd parti’. Yna rydych chi’n rhoi’r ffurflen hon i’ch banc neu gymdeithas adeiladu a bydd yn caniatáu i ffrind neu berthynas dynnu arian o’ch cyfrif ac yna talu am rai biliau i chi.

Os ydych chi’n defnyddio cyfrif cerdyn Swyddfa’r Post, gellir rhoi ail gerdyn i’r person sy’n casglu eich budd-dal.

Mae rhai taliadau rydych chi’n eu gwneud yn fisol sy’n bwysicach nag eraill ac mae’r taliadau blaenoriaeth hyn yn cynnwys rhent, morgais, treth y cyngor, nwy, trydan, trwydded deledu, dirwyon llys ynadon a chytundebau prynu llogi. Maent yn flaenoriaethau oherwydd os na fyddwch chi’n eu talu, gallech chi golli rhywbeth pwysig, e.e. os na fyddwch chi’n talu’ch rhent, gallech chi golli’ch cartref.

Nid yw taliadau i gardiau credyd, benthyciadau heb warant, catalogau, gorddrafftiau a chardiau siop yn flaenoriaethau. Os na allwch fforddio eu talu, bydd eich sgôr credyd yn cael ei effeithio, ond fel arfer ni fydd dim yn cael ei gymryd oddi wrthych.

Yn gyffredinol, mae’n bosibl talu am y rhan fwyaf o nwyddau neu wasanaethau drwy ddebyd uniongyrchol neu orchymyn sefydlog, sef lle mae arian yn cael ei gymryd yn uniongyrchol o’ch cyfrif banc a’i anfon yn syth at bwy bynnag y mae angen i chi ei dalu, fel arfer tua’r un amser bob wythnos neu fis. Os ewch chi i’r ysbyty, cyn belled â bod gennych chi ddigon o arian yn eich cyfrif, bydd y taliadau hyn yn parhau i gael eu gwneud yn awtomatig.

Os na allwch fforddio eich biliau diangen, dylech chi neu berthynas ysgrifennu at y cwmnïau ac egluro pam. Gallwch hefyd ganslo unrhyw daliadau diangen sy’n ddyledus i fynd allan o’ch cyfrif banc.