Cronfa Gymdeithasol

Gallech gael help gyda thaliadau untro neu daliadau achlysurol drwy’r gronfa gymdeithasol os ydych chi ar incwm isel ac yn bodloni’r amodau.

Efallai y bydd y gronfa gymdeithasol yn gallu rhoi’r canlynol i chi:

• Grant mamolaeth,
• Arian i helpu gyda thaliadau angladd,
• Taliadau Tywydd Oer, neu
• Benthyciad cyllidebu.

Ni fydd yn rhaid i chi ad-dalu unrhyw arian a gewch fel grant mamolaeth, Taliad Tywydd Oer na thaliadau angladd. Fodd bynnag, gellir cymryd arian ar gyfer taliadau angladd yn ôl o ystâd y person sydd wedi marw.

Gall y gronfa gymdeithasol roi benthyciad cyllidebu i chi. Mae benthyciadau cyllidebu ar gyfer cymorth gyda thaliadau mawr hanfodol untro sy’n anodd cynllunio ar eu cyfer, fel boeler sydd wedi torri. Mae’n rhaid i chi ad-dalu benthyciad cyllidebu i’r gronfa gymdeithasol, ond maent yn ddi-log. Os ydych chi’n derbyn Credyd Cynhwysol, ni fyddwch chi’n gallu gwneud cais am Fenthyciad Cyllidebu , ond efallai y byddwch chi’n gallu gwneud cais am Ragdaliad Cyllidebu yn lle hynny.

Ers mis Ebrill 2013, nid yw benthyciadau argyfwng a grantiau gofal cymunedol ar gael mwyach. Mae benthyciad tymor byr wedi disodli benthyciadau argyfwng. Efallai y byddwch yn cael hwn os oes rhaid i chi aros i gael eich taliadau budd-daliadau; mae hyn yn golygu y bydd yr Adran Gwaith a Phensiynau yn benthyca rhywfaint o arian i chi, a bydd yn rhaid ad-dalu’r benthyciad tymor byr, yn union fel benthyciad argyfwng.

Nid yw grantiau gofal cymunedol wedi cael eu disodli. Mae awdurdodau lleol wedi cael y dewis i sefydlu cynlluniau i gymryd lle ‘grantiau gofal cymunedol’ os ydynt yn dymuno gwneud hynny, ond efallai na fydd rhai awdurdodau lleol yn sefydlu cynlluniau o gwbl. Bydd angen i chi gysylltu â’ch awdurdod lleol i gael rhagor o wybodaeth am yr hyn sy’n digwydd yn eich ardal, ac efallai y byddwch hefyd yn gallu cael cymorth gan elusen grantiau fel Turn2us.